Austra Skujiņa

Austra Skujeņa (1909. - 1932) - ailineica, kurei vysod byus 23 godi. Juos fenomenu naveidoj izcyli dasnāgumi literaturā, tok tragiski eisuo dzeive, nūslāpumaineiba, romantiskuo doba i vīglai atmaneituos ailis vys ir bejušs ļaudim daveļceigys. Da šam latgaliski Austrys Skujenis ailis vēļ navā skaiteitys, dieļtuo ite puors aiļu.

Elegeja

Otkon šybā spīžas tymsa malnuo,
vokors lieni, lieni sūļus caļstineij.
Dīna iztveikoj kai cigaretis palni,
Myužs nu godu okys suopi smeļ.

Lūgā izzīd lada hiacintis,
smuordūs kiup. Ci vorbyut pošu sirds
veitumā agrā zem sapynu saulis syltuos
izgaroj i lieni kryutežā myrst.

Ite nu tu esi, ai, dzeive muna, -
tik drupys viņ. Tik krystu pulks.
Vorbyut šunakt leis munu bieru zvonu,
pyrms iz gaņka reita vāsums guļs.

Otkon šybā spīžas tymsa malnuo,
otkon nakts i susātivi īt.
Pīri gluosta vīntuleibys dalna,
myužs nu godu okys suopi smeļ.

Rūka ar puči

Ka zīds, kū tev snēdzu,
ir meile,
tod
najem tū pretim:
var smuords nūkliut leidz sirdei –
i beigi.

Ka zīds, kū tev snēdzu,
ir sapyni,
svīd zemē!
Sapyni dzeļ smadzenēs
rātys.

Bolts prīces spaits
caur aizamyglūtu šybu –
zīds dzaltonais.
Ci eistyn naradzi:
ir vacuo zeme
skaiška.

Tu vari rauduot

Tu vari rauduot, i tu vari lyugtīs,
tu vari salimt navareigs i vaidāts –
tik rudiņa vieji stucinēs pi šybom,
tok sūļu rytmi ūļneicuos nanūryms.

Tu vari nuašņuot, nūmyrt ceļa molā,
nivīns tev naatīs pi pīrys gluostā dūrtīs,
nivīns... Tik bezgaleiguo zvaigžņu spaitā
spūdrys myrguos svešu sauļu myrgums sluobs.

Tu vari pasamūstīs nu jauna, suokt nu gola –
vyss byus vysvīns. Vorbuyt net ļauneigai vieļ:
nivīnys durovys naatsadareis tev vaļā,
nikur kur īt, kod kriesloj vokors vāls.

Meitinei kopejneicā

Gaudys acs jiusim šūvokor,
Skume byrgst zyllganūs dyumūs.
Lyuzis ci pādejais zīdu zors
sapynu leiganam kryumam?

Dziļu smaidu jiusim šūvokor
lyupys grīž. Dziļu kai nuove,
nūlyuzt kur myuža koltušais zors,
Dzīsnuojūt mūceibu sarkaņom.

Solveigys dzīsmi patafons voikuoj.
Acs jiusim izgaroj žālobys.
Tik lyupys dzeļ sasteiviejs smaids,
baimeiguoks kai jiura pyrms vātrys.

Gaudys acs jiusim šūvokor,
gaudys kai gaistūši dyumi.
Nūlyuzs pādejais zīdu zors
leiganam sapynu kryumam.

© Ailis - Austra Skujiņa © Puorvārsums - Alnis